للاسف من امبارح في كمية من النخب السودانية المستنيرة ماخدة موضوع حرب إيران باستخفاف عجيب جداً في الوقت الإحنا كسودانيين مفترض نشوف اثر الحرب علينا ح يكون شكلو كيف ؟
مافي زول يفتكر انو البيحصل في إيران ح يكون بعيد مننا لانو البيحصل هناك عبارة عن مسمار جديد في نعش استقرار الطاقة العالمي و الموجة الارتدادية ممكن توصل للسودان في اسرع وقت ممكن تتخيلوهو.
احنا يا جماعة قدام اكبر تهديد لممرات الطاقة من زمن حرب الناقلات في الثمانينات و معروف انو مضيق هرمز عبارة عن شريان بتمر خلاله ٢١٪ من تجارة النفط العالمية و اي تعطيل في الممر ده لو بنسبة ١٠٪ بس ح يعمل ارتفاع سريع جدا للاسعار خلال ايام بسيطة.
ح يطلع واحد راسو مربع يقول لي السودان علاقته شنو ؟ رغم انو لو عمل بحث صغير ح يعرف انو قرابة الـ٧٠٪ من وارداتنا بتمر عبر موانئ بتعتمد على خطوط تموين من الخليج و مصر و اي زيادة و لو بسيطة في التكلفة البحرية ح تنعكس مباشرة على السلع الاساسية عندنا.
احنا يا جماعة قدام حرب الجيل الجديد في البحار .. دي ما حرب مدافع تقيلة و متحركات .. دي حرب اجهزة تشويش الجي بي إس البتخلي السفن تتوه و المسيرات البحرية الصغيرة البتفجر اكبر الناقلات و الالغام المغناطيسية البركبوها في جسم السفينة و بعد كده تتفجر في التوقيت المطلوب و الصواريخ الدقيقة بعيدة المدى.
بالمختصر كده اذا استمرت الحرب لنهاية الاسبوع ممكن تقفز قيمة التامين و الشحن لقريب ٤٠٪ و ح ترتفع تكاليف الحاويات و ح يزبد وقت الرحلة لاي شحنة.
من المعلوم في وقت الحروب بتهرب الاموال من المخاطرة و تمشي للدهب و السلع الصلبة و دي قاعدة اقتصادية و بالنسبة لينا في السودان ح يرتفع سعر الدهب و ترتفع تكاليف الاجهزة الالكترونية و يزيد الطلب على الدولار اذا استمرت الحرب لاسبوعين بس.
و احنا اساسا وضعنا الاقتصادي هش و اسواقنا بتتاثر باضعف موجة خارجية خاصة و انو اقتصادنا اقتصاد حرب و معتمدين بصورة كبيرة على استيراد السلع الاساسية و السوق الموازي عندنا بيتحرك بالاخبار و الاشاعات و حتى تحويلات المغتربين البتعتبر شريان حياة للملايين ممكن تتاثر بسبب التوترات المالية المحتملة في المنطقة.
انا ما بخوف في الناس لكن كمان لازم الناس تعرف انو استمرار حرب إيران فيه ضرر اقتصادي كبير للسودان ح يوصل لجيوب الناس بسرعة كبيرة و لو في نصيحة بقول للناس العندها قروش انو ما يمسكو كل السيولة و يقعدو يتفرجو .. قسموها ما بين سيولة بسيطة و دهب و دولار لحدي ما تتضح الصورة خلال الاسبوع ده و بالذات المغتربين مفترض يخففو المصاريف و يأجلو اي سفريات و يركزو على الضروريات و باذن الله ازمة و تعدي بس المهم انو الناس تعمل حسابها بدل ما نقعد نشمت و نستخفف و نتخيل انو احنا بعيدين من الازمة و آثارها.
عن نفسي متاكد و واوثق تماماً بانو دكتور جبريل ابراهيم جاهز تماماً للازمة دي بالسياسات و الخطط لانو للامانة الراجل استطاع في فترة معركة الكرامة انو يسيطر على الدولار الكان متوقع يقفز لارقام فلكية.
نزار العقيلي
