اليوم فتحنا حساب “بنكك” أونلاين وبالرقم الوطني بس، لأنه فتح الحساب أونلاين في بنك الخرطوم زمان كان مربوط بجواز السفر. لقينا الخبر دا وقلنا نجرب ما خسرانين حاجة.
في أقل من عشرة دقايق، طق طق، من خطوة للتانية والموضوع ماشي معانا باسطة! بديناها برقم تلفون الشخص المعني، ما تمت ثواني رسلو رمز لتأكيد الرقم، بعديها الرقم الوطني دخلنا الأرقام، بعديها التصوير وقِبِل الصورة، بعديها التوقيعات التلاتة بتتصور في ورقة وبتترفع عبر نفس الصفحة الشغال عليها في فتح الحساب، وبعديها إرسال الملف.
ثواني طوالي… مبروك تم فتح حسابك في بنك الخرطوم، رقم الحساب هو *** (حمّل الصفحة قبل الخروج). عملت إسكرين شوت من الصفحة ومرقت.
الخطوات الفوق دي كل خطوة بعد تنتهي منها بتسلمك للخطوة البعديها، لو الخطوة القبليها ما ظبطت ما بتنتقل للمرحلة البعديها. وطبعاً في بيانات بتتملي في الخطوة الأولى زي: المرحلة الجامعية، ومصدر الدخل، ومحل العمل الحالي، وعنوان السكن، والدخل الشهري.
وأهم حاجة الإيميل حقك؛ تسجل إيميل حقيقي ويكون إيميل يستمر معاك، ما نوع الإيميل البتعملو مع كل تلفون جديد، يكون إيميل ثابت ينتقل معاك في كل تلفوناتك. وفي بيانات بتعمل في محلها صاح أو غلط، هم تلقائياً بيعملوا ليك صاح في كلمة (لا)، زي: “هل أنت مواطن أمريكي؟” بتلقى كلها مصححين ليك محل (لا) لأنهم عارفنك سوداني… وخليك سوداني!
الشغلانة دي بتوفر عليك نظرات الموظفين عبارة (السيستم طلع برة الشبكة) ، لا بتحتاج واسطة لا بتقيف في الشمس والصفوف الطويلة.
بعد طلعت، سجلت رقم الحساب وخشيت من حسابي في بنكك، جيكت على الحساب الفتحناهو لقيت البيانات سليمة، وأداني الإسم كامل حق الشخص الفتحنا ليهو الحساب. بعد كم ساعة كدا، رسلو الرقم السري حق الحساب على رقم التلفون الإتسجل بإسم صاحب الحساب، أول ما الرقم السري وصل خشينا حساب بنكك في تلفونو، وفعلاً حسابو حق بنكك ظبط، وغير الباسويرد بواحد جديد وقوي.
فتح الحساب أونلاين زي الحمار المكادي في ناس مابظبط معاهم نهائي، في واحد جربنا ليهو كل مرة الرد بجينا لا يمكن فتح الحساب الرجاء زيارة أقرب مركز للبنك ، لكن إتضح لي إنه الشخص دا حاول يفتح الحساب أونلاين كتير وبصل لمراحل متقدمة ويطلع ، هنا السستم طوالي بحظر الرقم دا لأنه بعتبر في شي ماعادي إحتيال أو قرصنة.
فتح الحساب حالياً قالوا متاح أونلاين بالرقم الوطني لفترة محدودة، ما عارف هل دا صاح ولا حايستمر بالرقم الوطني؟ لأنه الحساب أونلاين كان لازم جواز، والرقم الوطني دا إلا من داخل البنك.
وداخل البنك طبعاً حدث ولا حرج؛ الزحمة ساي تخليك تقنع من حاجة إسمها فتح حساب. الشغل الأونلاين دا سمح وممتع، معقولة حساب في عشرة دقايق والواحد بيجغم في كباية شاي؟ لا لي زول دفرك، لا في زول عفصك، لا في زول حمر ليك!
والله يوم تمشي البنك عشان تفتح حساب تشيل هم وتشيل عكاز، ويسفكروك تقول ماشي معركة أم دبيكرات!
(معاذ محمد)
ارغب في فتح حساب تجاري بنك الخرطوم
حيث لدي حساب توفير
ارغب في فتح حساب تجاري بنك الخرطوم
حيث لدي حساب توفير وذلك لحسن خدمات البنك في فرص التمويل الاصغر
عندي حساب جاري فى بنك الخرطوم – اريد التفغيل
ابوسليم
ياسر مهدي احمد محمد